لا أجمل ولا احلى !!

عنيكى الجميلة
خدتنى فى رحله
دقايق قصيره
لا أجمل ولا احلى
ولما رجعت ..
لنفسى وكيانى
لقيتنى لوحدى ..
وقاعد مكانى ..
لكن قلبى فوته
أمانه معاكى
بينبض بحبى ..
ويطلب رضاكى
ويحلم يا عمرى
هواى – فى لحظه – يوافق هواكى
وألاقى أيديه بتحضن أيديكى
وأفرد قلوعى فى بحرين عنيكى
أشرق .. أغرب
وأبعد وأقرب
أسافر .. أخاطر
أواجه مخاطر
أتوه فى الموانى
وينده حنانك يرجعنى تانى
وترسى سفينتى
على شط قلبك
وأشوف نفسى جنبك
أمير الزمان
ومهما – يا عمرى – أتوه فى المكان
مسيرى راح أرجع
وأحضن هواكى
تأخدنى عنيكى الجميله فى رحله
دقايق قصيره
لا أجمل ولا احلى !!