بنــــات ثانــــوي

 
الرئيسيةاليوميةالتسجيلدخول

شاطر | 
 

 كفرت بيكى

اذهب الى الأسفل 
كاتب الموضوعرسالة
Admin
Admin
avatar

ذكر عدد الرسائل : 351
العمر : 68
البلد : مصر أم الدنيا
الوظيفة : معلم بالترية والتعليم
الهواية : الكمبيوتر- الاطلاع -الموسيقى الهادئة -كرة القدم
رقم العضوية : 1
تاريخ التسجيل : 31/01/2008

مُساهمةموضوع: كفرت بيكى   الجمعة 14 أغسطس 2009, 2:26 am

لحظة خروجى للحياه .. حبك فى شريانى أتولد
ورضعته من ضى العيون السمر على شطين واديكى
غمسته ويَّا لقمتى ..
وغزلت منه هدمتى ..
وجعلت منه غنوتى طول سكتى


..ثلاثين سنه .. حاضن هواكى فى مقلتى
لكنى بعد الحب ده .. كفرت بيكى!!
ثلاثين سنه..
حاضن هواكى وبانجلد!!
كل البيبان متقفله..
مافيش فى حضنك غير هموم مالهاش عدد
حتى الأيدين متسلسله. .
مشدودة حوالين الرقاب..
حضنك حقيقة أم سراب ؟
حبك دوا ولاَّ عقاب ؟
ثلاثين سنه باسأل ولا ترديش جواب
مديت إيديا أحضنك .. ما لقيت أيديكى..
كفرت بيكى!!
ابنك أنا..
زى ما انتى محتجالى أسندك..
محتاج أنا
محتاج أنا شوية أمل..
حبة حنان .. حبة دفا..
يا أم الوفا..
ليه كل خاين م الورود واخد نصيبه..
والشوك نصيبى لوحدى منك ؟
مع إنى جوه القلب شايل طول العمر همك!!
فى كل لحظة بتنسرق من روحى حته..
ولا انتى هامك
قربت أموت..
بانده عليكى بأعلى صوت..
دفينى بحنانك لاموت..
بانده ولا بيجينى صوت..
ما تردى حتى بنظرة يا أمه من عنيكى..
كفرت بيكى!!
ابنك أنا..
ثلاثين سنه .. مستنى ألقى معاكى فرحة
ع الدموع العين تنام..
ع الأنين القلب يصحى..
روحى رايحالك ولكن..
قسوتك للقلب جارحه
يا أم الحنان
ابنك أنا .. معقوله قلب الأم يقسى؟
نفسى أحس إنك بأوجاعى وجراحى لسه حاسه
نفسى أحس بإن قلبك حى لسـه
لسه بينبض بالأمل..
لسه بيحلم بالنهار..
لسه بينده ع الولاد :
” اطمنوا .. مهما السواد على وشى زاد
لابد بكره يجينى ضى
الفجر جاى..
أتوضا بالنور وأغتسل..
يتفك قيدى وانتصر..
على ضلمة الروح اللى خلت
جيوش البوم تعشش فى السما وفى كل حى “
مستنى أنا..
سمعينا يا أمه صوتك..
ملعونه نومتك .. قومى يالله من سكوتك..
افتحى للفجر بابك .. واندهى..
تلقينى شابك قلبى فى قلبك وواقفلك تمام
لسه وريدى بينتفض هادر باسمك..
إياكى صدقتى إنى يوم أكفر بحبك..
عشقك فى دمى..
يا حبيبى وأمى وبلادى الجميلة
ما أعرفش انتى دبتى فىَّ..
ولاَّ أنا اللى دبت فيكى ؟
يا صلاتى وقبلتى..
كفرت بالبوم والسكات .. وآمنت بيكى !!؟
الرجوع الى أعلى الصفحة اذهب الى الأسفل
http://banatthanawy.mam9.com
 
كفرت بيكى
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
بنــــات ثانــــوي :: 
المنتديات الثقافية
 :: شعر وخواطر
-
انتقل الى: