أخوتى الكرام أعضاء المنتدى، حباً فيكم ، وحباً فى الشعر ، يسرنى ان أقدم لكم ديوانى الخاص وهو بعنوان (مشتاق للدفا) وهو بالعامية المصرية أرجو أن يعجبكم وينال رضاكم. وإليكم القصيدة الرئيسية التى عليها اسم الديوان:
مشـتـاق للـدفــا
دوبيـنى فى بحـورك
أبدريـنى فـوق رمـالك
تـوهيـنى
غـربيـنى
وارجـعى تـانى بحـنانـك لمـلمينى
وابـدريـنى فـ أرض نيـلك حَ تـلاقيـنى
طـرح من ورد وثمـار
زارع الأيـام خَـضَار
فجـر يخـلق لك نهـار
إيـد بتبـنى للعمـار
بسـمه تقـضى عَ المرار .. لو ظـهر حـزن فـ سـنينك
دوبيـنى وسـط ناسـك
قلـبى مشـتاق للـدفـا
ليـه فى ليـلك حـاسـس القلـب بجـفا ؟
ليـه تخـونى عهد مخـلوق للـوفـا ؟
وانتى اللى كان العـدل دينـك
والأمـان دايـماً لجـيلك
والغـريب لـمّا تديق الدنيا بيـه لازم يجيـلك
قلبى باللهـفه يناديلك:
يا بلـدنا لملميـنا
جـوه تـوبك وأجمعيـنا
أوعـى للحـزن تسـيبينا
قاسـى ليـه قلبـك علينا
واحـنا مادينـلك إيـدينا
لاجـل م الغربـه تنادينا
نيجـى ونسـدد جميـلك
دمـنا من نـبع نيـلك
والمـلامـح فى وشـوشـنا لـون جـبينك
كل نبضـه من قلـوبنا بتنـاديلك:
أوعـى يـاامـه تضـيعينا
أوعـى يـاامـه تضـيعينا
مهما عنـك تبعـدينا
أو فـ يوم تقسـى علينـا
مهما تاخـدنـا الأمـاكن
مهما روحـنا ولاَّ جـينـا
قلبك أكيـد هـايحـن ليـنا
ويـناديـنا
نيجـى والـدمـع فـ عنيـنا
لاجـل تاخـدينا فى حضـنك
مـا انتى ياامـه مهما تقسـى
الحـنان فى الأصـل طـبعـك
الحـنان فى الأصـل طـبعـك
